Straight Forward by Shoon Naing ရွှန်းနိုင် တဲ့တိုး ပြောပြီပေါ့လေ၊ ဒါမှမဟုတ်လည်း တုတ်ထိုး အိုးပေါက် ပြောတတ်သူ ရွှန်းနိုင်ပေါ့။

နာမည်မှာက အရှိန်တစ်ခုပါတယ်လို့ ခံစားမိလိမ့်မယ်။ လူငယ်တွေမှာ အရှိန်တစ်ခုရှိတယ်။ ဒါကို လူငယ်ဖြစ်ဖူးကြတဲ့သူတိုင်း သိကြပါတယ်။ လူငယ်ဘဝမှာ လူကြီးကြိုက်အောင် နေခဲ့သူတွေကတော့ ဒီအရှိန်ကို နားလည်ချင်မှ နားလည်လိမ့်မယ်။ အဲ့အရှိန်ဆိုတာကြီးက မှန်တာ/မှားတာ တရားတာ/မတရားတာ မဟုတ်ဘူး ပြင်းအားသက်သက်ပါပဲ။ လူ့အဖွဲ့အစည်းရဲ့ တံတိုင်းတွေ၊ ချည်နှောင်မှုတွေ၊ သံကွန်ချာတွေကို ဒီအရှိန်နဲ့ပဲ ရုန်းထွက်ကြတယ်။ ရွှန်းနိုင်ရဲ့ Straight Forward Podcast မှာ ဒီအရှိန်တစ်ခုကို ကောင်းကောင်းကြီး ခံစားရမယ်လို့ အာမခံတယ်။

မှန်တာ/မှားတာ တရားတာထက် လူငယ်တွေမှာ ဘဝဓါတ်ခွဲခန်းထဲက အတွေ့အကြုံတွေရှိတယ်။ ဒီအတွေ့အကြုံတွေကို တဲ့တိုးတင်ဆက်သွားမှာကတော့ မြန်မာနိုင်ငံက ကလောင်ထက်တဲ့ သတင်းထောက်တွေထဲက တစ်ဦးဖြစ်သူ ရွှန်းနိုင်ပဲဖြစ်ပါတယ်။ ရွှန်းနိုင်ဟာ နိုင်ငံတကာ သတင်းလောကမှာ ဂုဏ်သိက္ခာမြင့်မားတဲ့ ပူလစ်ဇာဆုရ ရှားပါးအမျိုးသမီးသတင်းထောက်ပါ။ ဒီအစီစဉ်ကို Burma Podcast Network မှ ဂုဏ်ယူစွာ ပူးပေါင်းတင်ဆက်ထားပါတယ်။