အတွဲလိုက်ထုတ်တဲ့ စာအုပ်တွေလို ခေါင်းစဉ်တပ်ရမယ်ဆိုရင်တော့ ဒီအပိုင်းဟာ 90 Minutes with Ye Aung Thu Podcast ရဲ့ တတိယပိုင်း (ဇာတ်သိမ်း) ပေါ့။ ဒီအစီအစဉ်ကို စပြီးပူးပေါင်းဆောင်ရွက်ကြကတည်းက ကိုယ်သိတာ၊ မသိတာ၊ မရှင်းတာတွေ အကုန်ရောမေးကြ၊ ကိုရဲအောင်သူက စိတ်ရှည်ရှည်နဲ့ ဖြေပေးရင်း အပိုင်းသုံးပိုင်းစာထိ ချဲ့ထွင်ထုတ်လုပ်နိုင်ခဲ့ပါတယ်။ ဒီ့အတွက် နားဆင်ကြသူတွေအဖို့ အများကြီးအကျိုးပွားမယ်၊ ကျေလည်းကျေနပ်ကြမယ်လို့ BPN ကယုံကြည်နေပါတယ်။ အခုဇာတ်သိမ်းပိုင်းမှာလည်း စစ်အတွင်းနဲ့ အကြပ်တည်းကာလတွင်းတွေမှာ အသက်ဓါတ်ကို ဉာဏ်ကူဆွဲဆန့်ပြီးတော့ မှတ်တမ်းယူနေကြတဲ့ စစ်အတွင်းသတင်းထောက်တွေ၊ ဓါတ်ပုံဆရာတွေရဲ့ စွန့်စားရုန်းကန်ကြရပုံတွေကို အက်ရှင်များများနဲ့ ကြားကြရမှာဖြစ်ပါတယ်။

ဓာတ်ပုံတစ်ပုံ ရိုက်လိုက်ပြီဆိုရင် ကိုယ်က အဲ့ဓါတ်ပုံအပေါ် ဘယ်လိုသဘောနဲ့ရိုက်လဲ မေးခွန်းထုတ်ဖူးကြလား။ လူတွေရဲ့ အပြုအမူလေးတစ်ခုက ကမ္ဘာတည်မယ့် မှတ်တမ်းမျိုးလည်း မဖြစ်သွားနိုင်ဘူးလို့ ပြောလို့ရလား။ ကိုယ့်ဓါတ်ပုံကိုယ် ဘယ်လောက်စေတနာရှိလဲ၊ ရိုးသားမှုရှိလဲ…? အထက်ပါ မေးခွန်းတွေရဲ့ ဂယက်အနက်တွေအပြင် သတင်းမှတ်တမ်း ဓါတ်ပုံဆရာ ကိုရဲအောင်သူရဲ့ ဘဝအချိုးအဆစ်တချို့ကိုလည်း ဒီအစီအစဉ်မှာ ကြားသိကြရမှာ ဖြစ်ပါတယ်။ ဒီအစီစဉ်ကို နှောင်းလူတွေအတွက် ဓါတ်ပုံပညာဆိုင်ရာ မှတ်တမ်းမှတ်ရာ တစ်ခုအနေနဲ့ ကျန်ရှိနေအောင် BPN ဝိုင်းတော်သားတွေနဲ့ ကိုရဲအောင်သူတို့ ပူးပေါင်းတင်ဆက်တာ ဖြစ်ပါတယ်။